利物浦成季流流长总会有低潮

今季一直顺风顺水慨利物浦，近期接连遭受挫折，近4仗3度落败，先喺欧联16强首回合作客0比1不敌马体会，再于上周喺联赛爆大冷吞屈福特3蛋，全季不败梦碎，跟住周中英足杯又畀车路士淘汰，未能重现曼联喺1999年缔造3冠王慨盛势。

到底「红军」系咪处于危机呢？但话得说回来，渠哋上年连夺欧联、欧超杯及世冠杯，现时喺联赛领先次席曼城22分，首捧英超指日可待，更造出跨季联赛44场不败骄人成绩，试问除咗阿仙奴（49场），仲有边队做到？一个球季流流长，总会遇上低潮，关键在于低潮期是长是短。犹记得2003-04年度阿仙奴虽全季不败，但亦试过1周内先后喺英足杯及欧联出局，依家就要睇吓「红军」主帅高普点样领军挨过难关。

再斗马体会至系戏肉
当然高普亦识分轻重，既然联赛不败金身被破，今晚英超头场迎战般尼茅夫慨重要性，明显降低。相信嚟紧下周中欧联16强次回合主场再斗马体会，先至见真章。我觉得利物浦今晚未必全力一击博反弹，不宜高估，博彩者敬请留意。